Теҳрону Душанбе дар заминаи такмилу бозсозии тунели Истиқлоли Тоҷикистон ба тавофуқ расиданд. Тунели Истиқлол маркази Тоҷикистонро ба шимоли ин кишвар муттасил мекунад ва Эрону Тоҷикистон барои такмили корҳои сохтмонии ин тунел 8 милюн дулор сармоягузорӣ мекунанд.
Ба гузориши Хабаргузории расмии Ҷумҳурии Исломӣ (ИРНО), вазири ҳамлу нақли Тоҷикистон ва вазири неруи Эрон тавофуқ карданд, ки ҳазинаи такмили тунели Истиқлол байни ду кишвар тақсим шавад ва ҳар кадом чаҳор милюн дулор барои бозсозии тунели Истиқлол ҳазина кунанд.
Ин тавофуқ дар ҳошияи нишасти дурӯзаи таъомул ва эътимодсозии Осиё, ки ахиран дар пойтахти Тоҷикистон баргузор шуд, ба даст омадааст.
Достони ин тунел ҳамонанди равобити Эрону Тоҷикистон пурфарозунишеб будааст. Ба назар мерасад тавофуқи ҷадид нишоне аз наздик шудани дубораи ду кишвари Эрону Тоҷикстон ва беҳбуди равобити ду кишвар дар сояи афзоиши танишҳо дар халиҷи Форс дошта бошад.
Тӯли тунели Истиқлол, ки тунели Анзоб ҳам номида мешавад, ҳудуди 5 килуметр аст ва замони сафар миёни Душанбе (пойтахт) ва Хуҷанд (дувумин шаҳри бузурги Тоҷикистон)-ро бисёр кӯтоҳтар мекунад.
Тунели Истиқлол соли 2006 ва дар ҳоле ки бахше аз он такмил шуда буд, ифтитоҳ шуд. Ҳазинаи аввалияи тунели Истиқлол 34 милюн дулор баровард шуда буд. Вале ҳазинаҳои изофии ин тарҳ мӯҷиби афзоиши сармоягузорӣ дар он шуд. Ҷониби Эрон то кунун беш аз 60 милюн дулор дар он сармоягузорӣ кардааст.
Ихтисоси будҷеи изофӣ барои тунел нишон аз беҳбуди равобити Эрону Тоҷикистон дорад, ки соли 2015 ва замоне ки охирин беҳсозӣ рӯи тунел сурат гирифт, ба тарзи чашмгире рӯ ба вахомат рафта буд.
Дар он сол давлати Тоҷикистон ҳизби наҳзати исломиро мунҳал кард. Авохири декабри 2015 Эрон мизбони бисту нуҳумин кунфронси ваҳдати исломӣ буд ва намояндагони ин ҳизб дуруст дар канори ҳайъати намояндагии Тоҷикистон нишаста буданд.
Дар солҳои баъд Тоҷикистон дар чанд маврид ба сурати манфӣ ба Эрон ишора мекард, масалан авохири тобистони 2017 телевизиюни давлатии Тоҷикистон як мустанади телевизиюнӣ пахш кард, ки дар он Эрон ба даст доштан дар ҷанги дохилии Тоҷикистон тайи солҳои 1992 то 1997 аз тариқи кумаки молӣ ба гурӯҳҳои мухолиф ва омӯзиши шибҳинизомиён муттаҳам шуда буд.
Акнун ба назар мерасад, ки мавқеъи об шудани яхҳои равобити ду кишвар фаро расида, моҳи гузашта хабаргузории Форс як мусоҳибаи қадимӣ бо Муҳйиддини Кабирӣ, раҳбари ҳизби наҳзати исломиро, аз вебсойти худ пок кард, ҳамзамон мақомҳои эронӣ дар изҳороти худ аз ин ҳизб фосила гирифтанд. Дар иваз, моҳи июни имсол вазири хориҷаи Тоҷикистон аз ширкат дар нишасти Созмони Ҳамкории Исломӣ дар Арабистони Саъудӣ сарфи назар кард, то ба Теҳрон сафар кунад.
Интишори хабари мараммати тунел нишони дигаре аз беҳбуди равобити ду кишвар дорад.
