Ба гузориши хабаргузории Осушиэйтид Прес, давлати Олмон аз эҳтимоли вуқӯъи даргирии низомӣ байни Эрону Омрико дар Ховари Миёна ибрози нигаронӣ кард.
Улрике Демер, сухангӯи Ангела Меркел, садри аъзами Олмон, рӯзи чаҳоршанбеи 15 май/25 урдибиҳишт дар ҷамъи хабарнигорон дар Берлин гуфт: “Мо табъан афзоиши сатҳи танишҳо дар минтақаро бо нигаронии зиёде дунбол мекунем ва аз ҳар гуна иқдоме, ки ба як роҳкори сулҳомез биянҷомад, истиқбол мекунем.”
Хонуми Демер дар идомаи ин суханон гуфт давлати Олмон ҳар иқдомеро, ки сабаби афзоиши танишҳо шавад, маҳкум мекунад. Мориё Адебор, сухангӯи Вазорати хориҷаи Олмон, низ эълом кард, ки ба рағми афзоиши танишҳо давлати Олмон қасд надорад коркунони сафоратхонаи ин кишвар дар Теҳронро коҳиш бидиҳад.
Давлати Олмон чаҳоршанбеи 15 май / 25 урдибиҳишт эълом кард, ба сабаби боло гирифтани танишҳо байни Эрону Омрико артиши ин кишвар барномаи омӯзиши нерӯҳои ироқиро мутаваққиф мекунад, ҳарчанд бино ба гуфтаи вазорати дифоъи Олмон, то кунун нишонае аз таҳдиди мушаххас алайҳи нерӯҳои низомии ин кишвар дар Ироқ мушоҳида нашудааст.
