Аз аввали моҳи апрели имсол давраи кӯтоҳмуддати омӯзиши забони авестоӣ дар Академияи илмҳои Ҷумҳурии Тоҷикистон баргузор шуд. Дар тӯли ин муддат то кунун забон ва дабираи авестоӣ барои гурӯҳе аз донишҷӯён ва алоқамандон аз сӯи устод доктор Раҳом Аша – пажӯҳишгари Маркази мутолиотии Осиё дар Фаронса омӯзиш дода шуд.
Давраи омӯзишии мазбур ба дархости гурӯҳи (кафедраи) забонҳои хориҷии Академияи илмҳои Тоҷикистон ва мусоидати Анҷумани фарҳангии «Рӯдакӣ»-и Фаронса роҳандозӣ шудааст. Биност дар оянда фурсате барои омӯзиши дигар забонҳои гурӯҳи эронии куҳан, аз ҷумла, суғдӣ, бохтарӣ, хоразмӣ низ ихтисос ёбад, ки иқдоми бисёр муҳим ва арзишманду дарвақт барои муҳити пажӯҳишӣ ва омӯзишии Тоҷикистон аст. Фаро гирифтани забонҳои эронии бостон ва кӯшиш дар таҷдиди мутолиоти тахассусӣ дар ин замина, дар воқеъ ибтикор ва ҳаракате муассир барои пур кардани бахше аз мутолиоти забоншиносӣ ва эроншиносӣ дар Тоҷикистон хоҳад буд, ки дасткам дар ҳудуди беш аз ду даҳаи ахир ба далели камбуди коршиносону пажӯҳишгарон, бо рукуди ҷиддӣ рӯ ба рӯ будааст.
Доктор Раҳом Аша муаллифи китобҳои «Фарҳанги «Авесто»: матн ва ёддоштҳои дастурии забон» (Avesta Glossary: Text and Grammatical Notes), «Порсиг (паҳлавӣ), дақоиқи дастури забон» (The Persic (“Pahlavi”). A Grammatical Precis.) ва дигар осори пажӯҳишӣ дар ҳавзаи мутолиоти матнҳои куҳан, бавижа матнҳои пизишкӣ дар адабиёти авестоӣ, санскрит (Омӯзаи пизишкии муғон, пустаи 1 / The Medical Doctrine of the Magi, vol. 1) ва ғ. аст.
