Чин сармоягузорӣ дар Тоҷикистонро афзоиш дода ва ҳатто дар ҳоли сохти мадраса дар ин кишвар аст. Коргарон ва мутахассисони чинӣ низ равонаи Тоҷикистон шудаанд.
Як пажӯҳишгари масоили Осиёи Миёна аз Қазоқистон дар бораи паёмадҳои ногувори нуфузи Чин дар Тоҷикистон ҳушдор дод.
Мурод Лимулин, дар матлабе дар сомонаи маркази таҳлилии «Остона» менависад, ки Тоҷикистон дар ин авохир мавриди таваҷҷуҳи хосси на фақат Омрико, балки Чин қарор гирифтааст.
Ба гуфтаи ӯ, сармоягузории Чин дар ин кишвар рӯ ба афзоиш аст, шумори зиёде аз нерӯҳои кории чинӣ ба Тоҷикистон сарозер шудаанд ва мизони қарзи Тоҷикистон аз Чин рӯ ба афзоиш аст. Дар ҳамин замина бисёриҳо аз ҳамакнун дар бораи гирифтор шудани Тоҷикистон дар доми иқтисодӣ ҳушдор медиҳанд.
Мурод Лимулин бо баррасии нуфузи рӯзафзуни Чин дар Тоҷикистон менависад, ки ин вазъият истиқлоли Тоҷикистонро таҳдид мекунад.
Ба навиштаи ин таҳлилгари қазоқ, бидеҳии Тоҷикистон аз Чин ба сатҳи 1 милёрду 200 милюн дулор расида, ки ин мизон беш аз нисфи кулли қарзи хориҷии Тоҷикистон аст. Ба дунболи сармоягузорӣ, нерӯҳои кории чинӣ низ вориди Тоҷикистон шудаанд, чиро ки дар қарордодҳои байни ду кишвар ҳузури коргарон ва мутахассисони чинӣ дар Тоҷикистон қайд шуда, ки ин сиёсати ҳадафманди Чин аст.
Мақомоти тоҷик ду ҳазор ҳектор заминро дар шаҳристони Мурғоб ва устони Хатлон дар ихтиёри кишоварзони Чин қарор доданд. Дар идомаи ин раванд батозагӣ Тоҷикистон боз 500 ҳектор заминро ба муддати 49 сол ба Чин вогузор кард.
Чин аммо ба сохтусози мадраса дар Тоҷикистон низ машғул аст. Ба нақл аз родиюи Садои Хуросон, ширкати чинии «Повер Чойно» то соли 2020 дар Тоҷикистон се мадраса бунёд хоҳад кард.
Арзиши умумии ин тарҳ панҷ милёрду 300 милюн дулор эълом шудааст ва ин мадорис зарфияти пазириши беш аз ду ҳазор донишомӯзро хоҳанд дошт.
Нуриддини Саид, вазири омӯзишу парвариши Тоҷикистон, гуфт: «Бо ин ширкати чинӣ барои сохти се мадраса дар Бохтар, Леваканд ва Данғара қарордод имзо шуда ва феълан ширкати чинӣ дар пайи баррасии ин тарҳ аст.»
Русия низ бо Тоҷикистон барои сохти панҷ мадраса қарордод имзо кардааст.
Пешбинӣ мешавад ин мадорис то бузургдошти сисолагии Тоҷикистон ба баҳрабардорӣ бирасанд. Мурод Лимулин ҳушдор медиҳад, ки Чин беш аз пеш дар ҷомеъаи Тоҷикистон нуфуз пайдо кардааст ва ин воқеъият метавонад суботи Тоҷикистон ва Осиёи Марказиро дучори халал кунад.
